Logo

मलेसियाबाट नेपालीको लागि दुःखद खबरः गाडी दुघर्टना हुँदा ३० जना नेपाली घाइते



मलेसिया, ११ असार । म ‘प्लेक्सस साइड’ कम्पनीमा काम गर्छु । यो मलेसियाको पेनाङमा पर्छ । कम्पनी र बस्ने होस्टल आधा घण्टाको दूरीमा पर्छ । जाम भयो भने त कम्पनी पुग्न ४५ मिनेट बसमा यात्रा गर्नुपर्छ ।

सधै झै आज पनि म कम्पनीकै बसमा ड्युटी जाँदै थिएँ । ७ बजेको ड्युटी भ्याउनुपर्ने हो । लगभग मलेसियाको समय अनुसार साढे पाँच बजेको थियो । होस्टलबाट बस एक किलोमिटर पनि अगाडि पुगेको थिएन ।

ट्राफिक लाइट रातो बलिरहेको थियो । हामी चढेको बस भन्दा अगाडि अरु बस पनि थिए । हामी ४० जना जति थियौं । त्यसमा ३० जना नेपाली नै थियौं होला । बसको एक्कासी ब्रेक फेल भयो ।

ड्राइभरले अगाडिको बसलाई बचाउन खोजे । बस त गन्द्रयाङ गन्द्रुङ गरेर पल्टियो । घुम्ती थियो । त्यही भएर होला बस पल्र्लक पल्टियो मात्रै । बसमा सवार सबैजना आत्तियौं ।

सबैजनालाई चोट लाग्यो । म पनि सिटमा ठोक्किएँ । गाला पिल्सिएको छ । कानमा पनि थोरै चोट लागेको छ । दुखिरहेको छ । तर उद्धार तत्कालै भयो । एम्बुलेन्स पनि आइहाल्यो । अस्पतालमा सामान्य उपचार गराएर अहिले होस्टलमा फर्किएको छु । घरमा पनि दुर्घट्ना र आफ्नो अवस्थाको बारेमा जानकारी गराइसकेँ ।

सात जना अस्पतालमा छन् : सागर उप्रेती

त्यही कम्पनीमै काम गर्ने सागर उप्रेतीका अनुसार अस्पतालमा अहिले सात जनाको उपचार भइरहेको छ । सामान्य घाइते भएकाहरु होस्टल फर्किसकेका छन् । कम्पनीमा बस दुर्घट्ना भएपछि फेसबुक पेज मार्फत उज्यालोलाई सागरले नै जानकारी गराउनुभएको हो ।

रातीको काम भएकाले उहाँ दुर्घट्नाबाट बच्नुभयो । उहाँका अनुसार दुई जना नेपाली र तीन जना इन्डोनेसियन कामदारलाई धेरै चोट लागेको छ । उनीहरुको पेनाङ अस्पतालमा उपचार भइरहेको छ ।

घाइते सागर मगर र उहाँकै साथी सागर उप्रेतीसँग फेसबुक म्यासेन्जरमा भएको कुराकानीमा आधारित । फोटो : सागर उप्रेती/ उज्यालो अनलाइबाट

प्रतिक्रिया दिनुहोस्