Logo

फेरि चम्किए सन्दीप लामिछाने, सीपीएलको डेब्यू खेलको पहिलो बलमै विकेट



काठमाडौं । नेपाली युवा स्पिनर सन्दिप लामिछानेले फेरि आफ्नो क्षमता प्रदर्शन गरेका छन् । क्यारेवियन प्रिमियर लिग सीपीएलमा उत्कृष्ट डेब्यू गर्दै पहिलो बलमै विकेट लिएर आफ्नो दमदार क्षमता प्रदर्शन गरेका हुन् । सीपीएल टोली सेन्ट किट्स एण्ड नेभिस प्याट्रियट्सबाट उनले बिहीबार सीपीएलमा डेब्यू गरेका हुन् । उनले सीपीएलका लागि पहिलो बलमै विकेट लिएर आफ्नो डेब्यूलाई उत्कृष्ट र अविश्मरणीय बनाएका हुन् । समग्रमा सन्दिपले ४ ओभर बलिंग गरी २ विकेट लिए ।

गुयानाको राष्ट्रिय रंगशालामा १४७ रनको लक्ष पछ्याएको गुयाना अमेजन वारियर्सबिरुद्ध दोस्रो ओभर बलिंग गर्दै उनले सीपीएल डेब्यू गरेका थिए । पहिलो बलमै उनले शानदार लेगस्पिनको सदुपयोग गरी गुयाना वारियर्सका भेट्रान ओपनर चाडविक वाल्टनलाई मिडअनको क्षेत्रमा बेन कटिंगको हातबाट क्याच आउट गराए ।

आफ्नो पहिलो ओभरमा विकेटसहित ३ रन खर्चेका सन्दिप छैटौं ओभरमा बलिंग गर्दा विकेट लिन नसके पनि किफायती बलिंग गरे । उनले मात्र एक रन खर्चिएका थिए । पहिलो बलमै विकेट लिएपछि विपक्षी ब्याट्सम्यान उनीप्रति सजग देखिन्थे ।

आठौं ओभरमा आफ्नो तेस्रो स्पेल लिएर आएका सन्दिपले ५ रन खर्चिए । सन्दिपले दोस्रो विकेट भने आफ्नो अन्तिम ओभरमा लिए । १०औं ओभरको दोस्रो बलमा १६ रन बनाएर खेलिरहेका वेष्ट इण्डिजका ब्याट्सम्यान ज्यासन मोहम्मदलाई डीप कभरको क्षेत्रमा टम कूपरको हातबाट क्याच आउट गराए । त्यस ओभरमा उनले विकेटसहित ४ रन खर्चिए ।

सन्दिप लामिछानेको यो तेस्रो अन्तर्राष्ट्रिय फ्रेन्चाइजी लिग हो । यसअघि उनले आईपीएलमा दिल्ली डेयरडेभिल्सबाट खेलिसकेका छन् भने क्यामडामा टी­२० प्रतियोगिता खेलेका छन् ।

प्रतिक्रिया दिनुहोस्